ဘာစီလိုနာအသင်းက လီဝန်ဒေါစကီးကို စာချုပ်သစ်ကမ်းလှမ်းလိုက်တဲ့ အသေးစိတ်အခြေအနေများ
ဘာစီလိုနာအသင်းဟာ သူတို့ရဲ့တိုက်စစ်မှူး ရောဘတ် လီဝန်ဒေါစကီးကို စာချုပ်သစ်တစ်ရပ် ကမ်းလှမ်းလိုက်ပြီဖြစ်ပါတယ်။
အတွေ့အကြုံရင့် တိုက်စစ်မှူးကြီးရဲ့ လက်ရှိဘာစီလိုနာနဲ့ချုပ်ဆိုထားတဲ့ စာချုပ်ဟာ အခုဘောလုံးရာသီကုန်မှာ သက်တမ်းကုန်ဆုံးတော့မှာပါ။
လီဝန်ဒေါစကီးကို အီတလီကလပ်တွေဖြစ်တဲ့ ဂျူဗင်တပ်စ်၊ အေစီမီလန်တို့နဲ့ သတင်းတွေထွက်ပေါ်နေသလို အမေရိကန် (MLS) နဲ့ ဆော်ဒီပရိုလိဂ်ကလပ်တွေဆီ ပြောင်းရွှေ့ဖို့ အခွင့်အလမ်းတွေလည်း ရှိနေပါတယ်။
စပိန်သတင်းစာ Sport ရဲ့ ဖော်ပြချက်အရ ဘာစီလိုနာအသင်းဟာ အသက် ၃၇ နှစ်အရွယ် ပိုလန်လက်ရွေးစင်တိုက်စစ်မှူးကို ၁၂ လသက်တမ်းရှိတဲ့ စာချုပ်တိုးမြှင့်ဖို့ ကမ်းလှမ်းခဲ့တာဖြစ်ပါတယ်။
အဲဒီစာချုပ်အသစ်မှာ လစာကို လက်ရှိရရှိနေတာထက် ထက်ဝက်နီးပါး (၅၀ ရာခိုင်နှုန်းခန့်) လျှော့ချဖို့ ပါဝင်နေပေမဲ့ ခြေစွမ်းပြသနိုင်မှုနဲ့ ပွဲထွက်ကစားနိုင်မှုအပေါ် မူတည်ပြီး ရရှိမယ့် အပိုဆုကြေး (Bonus) တွေကိုတော့ အများအပြား ထည့်သွင်းပေးထားပါတယ်။ လက်ရှိမှာတော့ လီဝန်ဒေါစကီးဟာ ဒီကမ်းလှမ်းမှုကို သေချာစဉ်းစားနေပြီး အကြောင်းမပြန်ခင်မှာ အချိန်ယူ ဆုံးဖြတ်သွားမှာ ဖြစ်ပါတယ်။
