မန်ချက်စတာယူနိုက်တက် ကွင်းလယ်လူဟောင်း နစ်ကီဘတ်က ကလပ်အသင်းအနေနဲ့ ဂါလာတာစာရေးအသင်းက နိုင်ဂျီးရီးယား တိုက်စစ်မှူး ဗစ်တာ အိုဆီမန်ကို ခေါ်ယူဖို့ ကြိုးစားသင့်တယ်လို့ အကြံပြုလိုက်ပါတယ်။

နွေရာသီမှာ RB လိုက်ပ်ဇစ်အသင်းကနေ ရောက်ရှိလာခဲ့တဲ့ ဆက်စ်ကိုဟာ အသင်းနဲ့ တဖြည်းဖြည်း အသားကျလာနေပြီး ခုချိန်ထိ ယူနိုက်တက်အတွက် ၂၈ ပွဲ ကစားပေးထားရာမှာ ၁၀ ဂိုး သွင်းယူထားနိုင်ခဲ့ပါတယ်။ ဒီတိုက်စစ်မှူးဟာ ရူဘင် အမော်ရင်ကို ထုတ်ပယ်ပြီးနောက်ပိုင်း ယာယီနည်းပြအဖြစ် ပြန်လည်ရောက်ရှိလာတဲ့ မိုက်ကယ်ကားရစ်ရဲ့ လက်ထက်မှာ ခြေစွမ်းတက်လာတဲ့ ကစားသမားတွေထဲက တစ်ဦးဖြစ်ပြီး ကားရစ်လက်ထက်မှာတင် ၈ ဂိုးအထိ သွင်းယူပေးထားတာပါ။ ဒါပေမဲ့ အသင်းမှာ ခြေစွမ်းပြန်တက်လာပေမဲ့လည်း ဆက်စ်ကိုဟာ အသင်းအတွက် အောင်မြင်တဲ့ ခေါ်ယူမှုတစ်ခု မဖြစ်သေးဘူးလို့ Paddy Power နဲ့ အင်တာဗျူးမှာ နစ်ကီဘတ်က ပြောကြားခဲ့ပါတယ်။

"ကစားသမားသစ်တွေ ခေါ်ယူရတာ ခက်ခဲတဲ့အလုပ်ပါ။ အလားအလာရှိတဲ့ ကစားသမားတွေကို ရှာဖွေခေါ်ယူလေ့ရှိပေမဲ့ အဲဒီလိုမျိုးပဲ ထပ်ခါတလဲလဲ လုပ်နေတာက သိပ်ပြီး အလုပ်မဖြစ်လှပါဘူး။ ဆက်စ်ကိုက သိပ်ပြီး အဆင်မပြေဘူးဖြစ်နေတယ်။ ဒါဟာ ရပ်စမတ် ဟွိုင်လန်းတုန်းကလို အမှားမျိုးပါပဲ။ ငယ်ရွယ်ပြီး သက်သေမပြနိုင်သေးတဲ့ တိုက်စစ်မှူးတစ်ယောက်ကို ငွေအမြောက်အမြားပေးပြီး ခေါ်ယူတာက သူ့အပေါ်မှာ ဖိအားတွေ အများကြီး သက်ရောက်စေပါတယ်။ သူဟာ ပြီးခဲ့တဲ့ အပတ်တွေအတွင်းမှာ ဂိုးအချို့ သွင်းယူနိုင်ခဲ့ပြီး ခြေစွမ်းပြခဲ့ပေမဲ့လည်း တကယ့်ကို အောင်မြင်မှုရနေတဲ့ သူမျိုးတော့ မဟုတ်သေးပါဘူး။ ဆက်စ်ကိုက နောက်ထပ် ၂ နှစ် ဒါမှမဟုတ် ၃ နှစ်လောက်နေရင် အဆင်သင့်ဖြစ်နိုင်ပေမဲ့ အခုလောလောဆယ်မှာတော့ မဟုတ်သေးပါဘူး။ အထူးသဖြင့် ချန်ပီယံလိဂ်လို ပြိုင်ပွဲမျိုးမှာပေါ့" လို့ ၎င်းက ဆိုပါတယ်။

ယူနိုက်တက်အနေနဲ့ ချန်ပီယံလိဂ်ဝင်ခွင့် ရရှိဖို့ ကြိုးစားနေချိန်မှာ အိုဆီမန်ကို ဒီနွေရာသီရဲ့ အဓိက ပစ်မှတ်အဖြစ် ထားရှိသင့်တယ်လို့လည်း နစ်ကီဘတ်က ရှင်းပြခဲ့ပါတယ်။ "ကျွန်တော့်အမြင်အရတော့ သူက အသင့်တော်ဆုံးပါပဲ။ တူရကီကလပ်တွေမှာ ကစားနေတဲ့ ကစားသမားတွေကို ခေါ်ယူဖို့က ပိုပြီး ဖြစ်နိုင်ခြေရှိတယ်လို့ ထင်ပါတယ်။ ကစားသမားခေါ်ယူရေးအဖွဲ့က အကောင်းဆုံးကစားသမားတွေကိုပဲ ကြည့်ရုံတင်မကဘဲ တကယ်ခေါ်လို့ရနိုင်မယ့်သူတွေကိုလည်း ကြည့်ရပါမယ်။ ပေါင် သန်း ၁၂၀ လောက် တန်ကြေးရှိပြီး မရနိုင်မယ့် ကစားသမားတွေနောက်ကို လိုက်နေတာက အချိန်ဖြုန်းတာပါပဲ။ ကျွန်တော့်အမြင်မှာတော့ သူက သန်မာတယ်၊ မြန်တယ်၊ ခံစစ်နောက်ကို ဖောက်ထွက်နိုင်တယ်၊ ကြံ့ခိုင်မှုကောင်းပြီး ဘောလုံးထိန်းတာလည်း ကောင်းပါတယ်။ ဒါ့အပြင် ဂိုးမျိုးစုံ သွင်းနိုင်သလို ဝေဟင်ဘောတွေမှာလည်း အားသာချက်ရှိပါတယ်" လို့ ဘတ်က ပြောကြားခဲ့ပါတယ်။

နွေရာသီ အပြောင်းအရွှေ့ကာလက နီးကပ်လာပြီဖြစ်လို့ ယူနိုက်တက်အနေနဲ့ ကစားသမားသစ်တွေကို ရှာဖွေနေမှာဖြစ်ပေမဲ့ တိုက်စစ်မှူးတစ်ဦး ထပ်မံခေါ်ယူဖို့ကတော့ ကားရစ်အတွက် ပထမဦးစားပေး ဟုတ်ပုံမရသေးပါဘူး။