ဝမ်ဘလေကွင်းမှာ ဂျပန်ကို ၁ ဂိုး - ဂိုးမရှိနဲ့ ရှုံးနိမ့်ခဲ့တဲ့ ရလဒ်ဟာ အသင်းအတွက် အမြင်သစ်တွေ ရရှိစေတယ်လို့ မာ့ခ်ဂူဟီက ပြောကြားလိုက်ပါတယ်။

ပွဲကစားချိန် ၂၃ မိနစ်မှာတင် ဘရိုက်တန်ကြယ်ပွင့် မီတိုမာက အနိုင်ဂိုး သွင်းယူသွားခဲ့တာကြောင့် အင်္ဂလန်နည်းပြ တူချယ်က ဒီရှုံးနိမ့်မှုဟာ "နာကျင်စရာ" ကောင်းတယ်လို့ ဖော်ပြခဲ့ပါတယ်။

ပြီးခဲ့တဲ့ သောကြာနေ့က ဥရုဂွေးနဲ့ ၁ ဂိုးစီ သရေကျခဲ့တဲ့ပွဲက လူစာရင်းကို တူချယ်က ၁၀ နေရာအထိ အပြောင်းအလဲလုပ်ပြီး အခုဂျပန်နဲ့ပွဲမှာ ပွဲထုတ်ခဲ့တာ ဖြစ်ပါတယ်။

ဂူဟီကတော့ အခုလို စိတ်ပျက်စရာကောင်းတဲ့ ရလဒ်ဟာ လာမယ့်နွေရာသီ ကမ္ဘာ့ဖလားပြိုင်ပွဲမတိုင်ခင် အင်္ဂလန်အသင်းအတွက် ပြန်လည်သုံးသပ်စရာတွေ ဖြစ်လာစေတယ်လို့ ပွဲအပြီးမှာ ပြောကြားခဲ့ပါတယ်။

"ဒါဟာ တကယ်ကို စိတ်ပျက်စရာကောင်းပေမဲ့ ကျွန်တော်တို့ လက်တွေ့ကျဖို့တော့ လိုပါတယ်။ ရာသီရဲ့ ဒီလိုအချိန်မျိုးမှာ အခုလိုပွဲစဉ်တွေ ကစားရတာက အသင်းတစ်သင်းအနေနဲ့ စမ်းသပ်မှုတွေ လိုအပ်နေလို့ပါ။ ကျွန်တော်တို့ဘက်က အမြင်မှန်နဲ့ ကြည့်မယ်ဆိုရင် ဒီပွဲတွေက အသင်းကို ပိုကောင်းအောင် တည်ဆောက်ဖို့၊ တိုးတက်လာဖို့နဲ့ နောက်တစ်ဆင့်ဖြစ်တဲ့ ကမ္ဘာ့ဖလားအတွက် အဆင်သင့်ဖြစ်အောင် ကူညီပေးနိုင်မှာပါ"

"ကျွန်တော်တို့ ဘယ်အခြေအနေမှာ ရှိနေသလဲဆိုတာ သိရဖို့ ဒီလိုပွဲတွေ ကစားရတာက အရေးကြီးပါတယ်။ အဓိကကတော့ သင်ခန်းစာယူဖို့နဲ့ အသင်းသားတွေ စည်းစည်းလုံးလုံး ရှိနေဖို့ပါပဲ"

"အင်္ဂလန်လက်ရွေးစင်အင်္ကျီကို ဝတ်ဆင်ရတာ မလွယ်ပါဘူး။ ကစားကွက်ကျနပြီး စည်းကမ်းရှိတဲ့ အသင်းတွေနဲ့ ကစားရတာပါ။ သူတို့ကလည်း ကမ္ဘာ့ဖလားဝင်ခွင့် ရထားတဲ့သူတွေဖြစ်သလို ဒီကိုလာပြီး သူတို့ရဲ့ အရည်အချင်းကို သက်သေပြချင်ကြတာပါ။ ကျွန်တော် ထပ်ပြောချင်တာကတော့ ကျွန်တော်တို့ စည်းလုံးဖို့၊ ဒီအချိန်ကနေ သင်ခန်းစာယူပြီး ရှေ့ဆက်ဖို့က အရေးကြီးတယ်ဆိုတာပါပဲ" လို့ ဂူဟီက ဆိုပါတယ်။

အင်္ဂလန်အသင်းဟာ ဇွန်လ ၁၇ ရက်နေ့မှာ အုပ်စု (L) ပြိုင်ဘက် ခရိုအေးရှား၊ ဇွန်လ ၂၃ ရက်နေ့မှာ ဂါနာ၊ ဇွန်လ ၂၇ ရက်နေ့မှာ ပနားမားတို့နဲ့ အမေရိကန်မြေမှာ ရင်ဆိုင်ရမှာဖြစ်ပြီး ၂၆ ယောက် လူစာရင်းကို မေလ ၃၀ ရက်နေ့မှာ နောက်ဆုံးထား ရွေးချယ်ရမှာ ဖြစ်ပါတယ်။

ပြီးခဲ့တဲ့အပတ်အတွင်း ဥရုဂွေးရော ဂျပန်နဲ့ပါ ကစားခဲ့တဲ့ ပွဲတွေမှာ မျှော်လင့်ထားသလို ဖြစ်မလာခဲ့တာက ဂျာမန်လူမျိုးနည်းပြအတွက် စိုးရိမ်စရာ ဖြစ်နိုင်ပြီး လူစာရင်းအတွက် ဆုံးဖြတ်ချက်ချဖို့ တူချယ်မှာ လအနည်းငယ် အချိန်ရပါသေးတယ်။