ဘိုင်ယန်မြူးနစ်နည်းပြ ဗင်းဆင့်ကွန်ပနီက အနားယူချင်တာကြောင့် ကမ္ဘာ့ဖလားပြိုင်ပွဲမှာ ဘောလုံးသုံးသပ်သူအဖြစ် ဆောင်ရွက်ပေးဖို့ ကမ်းလှမ်းချက်ကို ငြင်းပယ်လိုက်ပါတယ်။

၃၅ ကြိမ်မြောက် ဘွန်ဒက်လီဂါဖလားကို ဆွတ်ခူးရရှိထားတဲ့ ဘိုင်ယန်မြူးနစ်အသင်းဟာ လာမယ့် ဗုဒ္ဓဟူးနေ့ညမှာတော့ လေဗာကူဆင်အသင်းနဲ့ ပြန်လည်ရင်ဆိုင်ကစားရမှာ ဖြစ်ပါတယ်။

ကွန်ပနီဟာ ဒီရာသီမှာ ဆုဖလား ၃ လုံး (Treble) ရယူနိုင်ဖို့ ရည်မှန်းထားပြီး လိဂ်ဖလားကို အောင်မြင်စွာ ရရှိထားပြီးဖြစ်လို့ ဂျာမန်ဖလား (DFB-Pokal) နဲ့ ချန်ပီယံလိဂ်ပြိုင်ပွဲတွေဘက်ကို အာရုံလှည့်နေပါတယ်။ ချန်ပီယံလိဂ်မှာတော့ ဘိုင်ယန်ဟာ ဆီမီးဖိုင်နယ်အဆင့်ကို ရောက်ရှိနေပြီဖြစ်ပြီး ပဲရစ်စိန့်ဂျာမိန်း (PSG) အသင်းနဲ့ တွေ့ဆုံရမှာပါ။

ဒီလအစောပိုင်းတုန်းက Daily Mail သတင်းစာရဲ့ ဖော်ပြချက်အရ အင်္ဂလန်ရုပ်သံလိုင်း တော်တော်များများက ကွန်ပနီကို လာမယ့်နွေရာသီ အမေရိကန်၊ မက္ကဆီကိုနဲ့ ကနေဒါနိုင်ငံတွေမှာ ကျင်းပမယ့် ကမ္ဘာ့ဖလားပြိုင်ပွဲအတွက် သုံးသပ်သူအဖြစ် ဆောင်ရွက်ပေးဖို့ ချဉ်းကပ်ခဲ့ကြတယ်လို့ သိရပါတယ်။

ဒါဟာ ရာသီသိမ်းပြီးပြီးချင်း အသင်းနဲ့အတူ အနည်းဆုံး လိဂ်ဖလားအောင်ပွဲခံပြီးတဲ့အချိန်မှာ လုပ်ဆောင်ရမှာလည်း ဖြစ်ပါတယ်။ ဒီကမ်းလှမ်းချက်နဲ့ပတ်သက်တဲ့ မေးမြန်းမှုကိုတော့ ဘယ်လ်ဂျီယံနိုင်ငံသား ကွန်ပနီက ပယ်ချခဲ့ပါတယ်။

ကမ္ဘာ့ဖလားနဲ့ပတ်သက်တဲ့ မေးခွန်းတောင် မဆုံးသေးခင်မှာပဲ ကွန်ပနီက "လုံးဝ မဖြစ်နိုင်ပါဘူး၊ လုံးဝပါပဲ" လို့ ပြတ်ပြတ်သားသား ပြောကြားခဲ့တာပါ။

"အားလပ်ရက်မှာ ကျွန်တော်က ဘာလုပ်ရမှာလဲ၊ တီဗွီမှာ သုံးသပ်သူအဖြစ် အလုပ်လုပ်ရမှာလား။ အဲဒီလိုသာ လုပ်နေရင် လာမယ့်နှစ် မြူးနစ်မှာ ကျွန်တော့်မိသားစု ရှိတော့မှာ မဟုတ်ဘူး" လို့ သူက ဆိုပါတယ်။

ကွန်ပနီဟာ သုံးသပ်သူအလုပ်နဲ့ အစိမ်းသက်သက်တော့ မဟုတ်ပါဘူး။ မန်စီးတီးအသင်းမှာ ကစားသမားဘဝ အတွေ့အကြုံတွေ ရှိခဲ့တာကြောင့် Sky Sports ရုပ်သံမှာ ရွိုင်ကိန်း၊ ဂယ်ရီနဗီးလ်၊ ဂျေမီကာရေဂါ၊ ဂရေဟမ်ဆိုးနက်စ်တို့နဲ့အတူ ပရီမီယံလိဂ်ပွဲစဉ်တွေအပြင် ၂၀၂၂ ကမ္ဘာ့ဖလားပြိုင်ပွဲမှာလည်း ပါဝင်သုံးသပ်ပေးခဲ့ဖူးပါတယ်။

ဒါပေမဲ့ အခုနွေရာသီမှာတော့ သူဟာ တခြားတာဝန်တွေကို ရှောင်လွှဲပြီး မိသားစုနဲ့အတူ အဖိုးတန်အချိန်တွေကို ကုန်ဆုံးစေချင်နေတာပါ။ ဒါဟာ အချိန်ပြည့် နည်းပြတစ်ဦးအနေနဲ့တော့ ပုံမှန်အားဖြင့် မဖြစ်နိုင်တဲ့အရာလည်း ဖြစ်ပါတယ်။