မန်ယူနဲ့ အက်သလက်တီကိုတို့ရဲ့ စိတ်ဝင်စားမှုတွေ ထွက်ပေါ်နေချိန်မှာ ရိုမဲရိုးအနေနဲ့ ဆက်လက်တိုးတက်အောင် ကြိုးစားဖို့ လိုတယ်လို့ အဂူရို ပြော
မန်စီးတီး ဂန္ထဝင်ကစားသမား ဆာဂျီယိုအဂူရိုက တော့တင်ဟမ် နောက်ခံလူ ခရစ္စတီယန်ရိုမဲရိုးရဲ့ အနာဂတ်နဲ့ ပတ်သက်ပြီး ထုတ်ဖော်ပြောကြားလိုက်ပါတယ်။ တော့တင်ဟမ်အသင်းဟာ ၂၀၂၆ ခုနှစ်အတွင်းမှာ တစ်ပွဲမှ နိုင်ပွဲမရသေးဘဲ ဝက်စ်ဟမ်း၊ လိဒ်စ်ယူနိုက်တက်နဲ့ နော့တမ်ဟမ် ဖောရက်စ်တို့ရဲ့ အောက်မှာ တန်းဆင်းဇုန်ထဲကို ရောက်ရှိနေတာပါ။
တကယ်လို့ တော့တင်ဟမ်သာ တန်းဆင်းသွားရမယ်ဆိုရင် ချန်ပီယံရှစ်ကို မဆင်းချင်တဲ့ စီနီယာကစားသမား အများအပြားကို ရောင်းထုတ်ရမယ့် အခြေအနေနဲ့ ရင်ဆိုင်နေရပါတယ်။ ကမ္ဘာ့ဖလားဆုရှင် ရိုမဲရိုးဟာလည်း အသင်းကနေ ထွက်ခွာချင်နေတဲ့ အဓိက ကစားသမားတစ်ဦး ဖြစ်လာမှာပါ။ ထိပ်တန်းကလပ်တွေနဲ့ သတင်းတွေ ထွက်ပေါ်နေချိန်မှာတော့ အဂူရိုက ရိုမဲရိုးအနေနဲ့ ရည်မှန်းချက်ကြီးတဲ့ ကလပ်အသင်းဆီ ပြောင်းရွှေ့ဖို့ စဉ်းစားသင့်တယ်လို့ Stake နဲ့ အင်တာဗျူးမှာ ပြောခဲ့ပါတယ်။
"ကျွန်တော်လည်း မသိသေးဘူး၊ ဒါက ရိုမဲရိုးရဲ့ ဆုံးဖြတ်ချက်အပေါ်မှာပဲ မူတည်ပါတယ်။ အက်သလက်တီကိုနဲ့ မန်ယူက လုံးဝမတူတဲ့ ကလပ်အသင်းနှစ်ခုပါ။ မန်ယူက ပိုပြီး ကစားကွက်ဖော်နိုင်တဲ့ အသင်းမျိုး ဖြစ်နိုင်ပေမဲ့ လက်ရှိမှာတော့ အက်သလက်တီကိုက မန်ယူထက် ပိုပြီး အဆင့်အတန်းမြင့်တဲ့ ခြေစွမ်းရှိပါတယ်။ သမိုင်းကြောင်းအရ နှိုင်းယှဉ်မယ်ဆိုရင် မန်ယူက သာနိုင်ပေမဲ့ အခုအချိန်မှာတော့ အက်သလက်တီကိုမှာ ကစားသမားကောင်းတွေ အများကြီး ရှိနေပါတယ်။ သူတို့က ဘောလုံးပိုင်ဆိုင်မှု အမြဲတမ်း အသာမရတတ်ပေမဲ့ ကျွန်တော်ကြည့်ခဲ့ရတဲ့ ပွဲတွေအရ သူတို့က နောက်တန်းကနေ စနစ်တကျ ကစားကွက်တည်ဆောက်နိုင်ကြပါတယ်။ သူ ဘယ်ကိုသွားချင်သလဲဆိုတာကတော့ သူ့ရဲ့ ဆုံးဖြတ်ချက်ပါပဲ။ တချို့ကစားသမားတွေက အသင်းမှာပဲ ဆက်နေချင်ကြပေမဲ့ အဓိကကတော့ ကိုယ့်ကိုယ်ကိုယ် ဆက်ပြီး တိုးတက်အောင် လုပ်ဖို့ပါပဲ" လို့ ၎င်းက ဆိုပါတယ်။
ရိုမဲရိုးဟာ ဒီလအစောပိုင်းက ဆန်းဒါးလန်းကို ၁ ဂိုး - ဂိုးမရှိနဲ့ ရှုံးနိမ့်ခဲ့တဲ့ပွဲမှာ ဒူးဒဏ်ရာရရှိခဲ့တာကြောင့် ရာသီကုန်အထိ အနားယူရမှာ ဖြစ်ပါတယ်။ ဒါကြောင့် ဒီပွဲဟာ တော့တင်ဟမ်အတွက် သူ့ရဲ့ နောက်ဆုံးပွဲစဉ် ဖြစ်သွားနိုင်ပြီး အနာဂတ်အတွက် စဉ်းစားဖို့ အချိန်ပိုရသွားစေမှာလည်း ဖြစ်ပါတယ်။
