ဗုဒ္ဓဟူးနေ့ညက လိဒ်ယူနိုက်တက်နဲ့ ၂-၂ ဂိုးနဲ့ သရေကျခဲ့တဲ့ပွဲစဉ်မှာ သူတို့အသင်းဟာ ဒီထက်မက ပိုရသင့်တယ်လို့ ဘုန်းမောက်နည်းပြ အန်ဒိုနီ အီရာအိုလာက အခိုင်အမာ ပြောဆိုလိုက်ပါတယ်။

ပွဲချိန် ၉၇ မိနစ်မှာ ရှောင်လောင်းစတပ်ရဲ့ ချေပဂိုးကြောင့် "ချယ်ရီသီးတို့" (ဘုန်းမောက်) ဟာ နိုင်ပွဲနဲ့ လွဲချော်ခဲ့ရတာ ဖြစ်ပါတယ်။

ပွဲအပြီးမှာ အီရာအိုလာက "ကျွန်တော် တကယ်ကို ဒေါသထွက်မိပါတယ်။ စိတ်ပျက်ရသလို ခံပြင်းလည်း ခံပြင်းမိတယ်။ ကျွန်တော်တို့ ၃-၁ ဂိုးဆိုပြီး အောင်ပွဲခံခဲ့ကြတာဆိုတော့ အခုရလဒ်က လက်ခံဖို့ တော်တော်ခက်ပါတယ်" လို့ ဆိုပါတယ်။

"အဲဒါက လူကျွံနေတာပါ၊ ဒါကိုတော့ လက်ခံရမှာပေါ့။ ပုံရိပ်တွေအရ အီဗန်နီလ်ဆင်က ၁ မီလီမီတာလောက် ရှေ့ရောက်နေတာမို့ ဒါကို လက်ခံရပါမယ်။ ဒါပေမဲ့ ၂-၂ ဖြစ်သွားတဲ့ ဂိုးကိုတော့ ကျွန်တော်တို့ လက်မခံနိုင်ပါဘူး။ လုံးဝ လက်မခံနိုင်စရာပါ။ ဒီလူကျွံအနေအထားက ရှင်းလင်းနေတာပဲ။ (ဂျော့ဂျီ) ပက်ထရိုဗစ်ကို အနှောင့်အယှက်ဖြစ်စေခဲ့တာ အမှန်ပါပဲ။ အခုပဲ ဒိုင်လူကြီးနဲ့ ကျွန်တော် စကားပြောခဲ့ပါသေးတယ်။ သူတို့က ဒါကို ဆုံးဖြတ်ရခက်တဲ့ အနေအထားမျိုးဖြစ်အောင် ကြိုးစားပြောဆိုနေကြပေမဲ့ ကျွန်တော်ကတော့ အဲဒီလောက် မခက်ခဲဘူးလို့ ထင်ပါတယ်။ သူ (လိဒ်ကစားသမား) က ပက်ထရိုဗစ်ရဲ့ လမ်းကြောင်းပေါ်မှာ ရှိနေတာဖြစ်လို့ မြင်ကွင်းကို ကွယ်စေခဲ့တာ သေချာပါတယ်။ ဘောလုံးက တစ်ဖက်ကိုသွားနေချိန် ပက်ထရိုဗစ်ကလည်း အဲဒီဘက်ကို ကြည့်နေတာဖြစ်လို့ အဲဒီကစားသမား ရှိနေခြင်းက ပက်ထရိုဗစ်အနေနဲ့ ဘောလုံးကို ကာကွယ်ဖို့ ပိုခက်ခဲသွားစေတာ အသေအချာပါပဲ။ အဲဒီနေရာမှာသာ ကစားသမား မရှိရင် သူ ကာကွယ်နိုင်မလားဆိုတာကတော့ သိပ္ပံစိတ်ကူးယဉ်ဇာတ်လမ်းလိုပါပဲ၊ ဘယ်သူမှ မသိနိုင်ဘူးပေါ့။ ဒါပေမဲ့ ကျွန်တော့်အမြင်အရတော့ သူ ကာကွယ်နိုင်မှာပါ။ ဘာလို့လဲဆိုတော့ သူက လောင်းစတပ်ရဲ့ အနေအထားကို မြင်နေရတာဖြစ်လို့ ဘယ်ဘက်ကို ခုန်ရမလဲဆိုတာ မှန်းဆလို့ရပါတယ်။ ဒါပေမဲ့ (ဂျိုး) ပီရိုး ရှိနေတာကြောင့် သူ ကာကွယ်နိုင်မှာလား၊ မကာကွယ်နိုင်ဘူးလားဆိုတာကို ဘယ်လိုမှ မသိနိုင်တော့အောင် ဖြစ်သွားရတာပါ။ ဂိုးသမားကို အနှောင့်အယှက် ဖြစ်စေခဲ့တာနဲ့တင် ဒါက ရှင်းရှင်းလင်းလင်း လူကျွံနေတာပါ။ သူတို့ပြောသလို ဆုံးဖြတ်ရခက်တဲ့ အနေအထားမျိုး မဟုတ်ဘူးလို့ပဲ ကျွန်တော် မြင်ပါတယ်" လို့ ပြောကြားသွားခဲ့ပါတယ်။