ကမ္ဘာ့ဖလားအဖွင့်ပွဲစဉ်မတိုင်ခင် တူရကီအသင်းက ပိုပြီးဖိအားများနေတယ်လို့ ဆော့ကာရူးအသင်းရဲ့ အဓိကကစားသမား ဒီဂျန်းနက် အခိုင်အမာပြောကြား
တူရကီအသင်းအနေနဲ့ ၂၄ နှစ်အကြာမှ ကမ္ဘာ့ဖလားကို ပြန်လည်ဝင်ရောက်ခွင့်ရတာဖြစ်တဲ့အတွက် အုပ်စု (D) ရဲ့ အဖွင့်ပွဲစဉ်မှာ ဩစတေးလျအသင်းနဲ့ ရင်ဆိုင်ရချိန်မှာ မျှော်လင့်ချက်တွေနဲ့အတူ ဖိအားတွေက တူရကီရဲ့ ပခုံးပေါ်မှာပဲ ရှိနေလိမ့်မယ်လို့ ဆော့ကာရူး ခံစစ်ကစားသမား မီလို့စ်ဒီဂျန်းနက်က ဒီအပတ်မှာ ပြောကြားခဲ့တာပါ။
တူရကီအသင်းဟာ ဥရောပဖလားပြိုင်ပွဲတွေမှာ မကြာခဏပါဝင်လေ့ရှိပေမဲ့ ကမ္ဘာ့ဖလားမှာတော့ နှစ်ကြိမ်သာ ကစားဖူးပြီး ၁၉၅၄ ခုနှစ်မှာ ပထမဆုံးအကြိမ် ပါဝင်ခဲ့ကာ ဒုတိယအကြိမ်အဖြစ် ၂၀၀၂ ခုနှစ်မှာ တတိယဆု ရရှိခဲ့ဖူးပါတယ်။ အခြားတစ်ဖက်မှာတော့ ဩစတေးလျအသင်းဟာ နောက်ဆုံးကျင်းပခဲ့တဲ့ ကမ္ဘာ့ဖလား ၅ ကြိမ်စလုံးမှာ ပါဝင်ကစားခဲ့ပြီး ၁၆ သင်းအဆင့်ကို နှစ်ကြိမ်တိုင်တိုင် တက်လှမ်းနိုင်ခဲ့ပါတယ်။
"တူရကီအသင်းက ၂၀၀၂ ခုနှစ်ကတည်းက ကမ္ဘာ့ဖလားလို ပြိုင်ပွဲကြီးတွေမှာ မကစားရသေးတဲ့အတွက် သူတို့မှာ ဖိအားတွေ အများကြီးရှိနေလိမ့်မယ်လို့ ကျွန်တော်ထင်ပါတယ်။ သူတို့အပေါ်မှာ မျှော်လင့်ချက်တွေရော၊ ဖိအားတွေပါ အများကြီးရှိနေတာပါ၊ ဒါပေမဲ့ ကျွန်တော်တို့ကတော့ အသင့်ရှိနေတာ သေချာပါတယ်" လို့ ဗန်ကူးဗားမြို့မှာ စနေနေ့ကစားမယ့် ပွဲမတိုင်ခင် ဒီဂျန်းနက်က သတင်းထောက်တွေကို ပြောကြားခဲ့ပါတယ်။
ဒီဂျန်းနက်ဟာ ၂၀၁၈ နဲ့ ၂၀၂၂ ကမ္ဘာ့ဖလားပြိုင်ပွဲတွေမှာ ဩစတေးလျအသင်းနဲ့အတူ ပါဝင်ခဲ့သူဖြစ်ပြီး ကမ္ဘာ့ဖလားအတွေ့အကြုံရှိခြင်းက အဆုံးအဖြတ်ဖြစ်လာနိုင်တယ်လို့လည်း ဆိုပါတယ်။ "တူရကီအသင်းဘက်က ကစားသမား ၂၆ ယောက်စလုံးက ကမ္ဘာ့ဖလားအတွေ့အကြုံ တစ်ခါမှမရှိဖူးသေးသူတွေ ဖြစ်လိမ့်မယ်လို့ ကျွန်တော်ထင်ပါတယ်။ ကျွန်တော်တို့အသင်းမှာတော့ ကမ္ဘာ့ဖလားအတွေ့အကြုံရှိပြီးသား ကစားသမား ၉ ယောက်တောင် ပါဝင်ပါတယ်။
ဒါကြောင့် ဒီအပိုင်းမှာတော့ ကျွန်တော်တို့က အတွေ့အကြုံ ပိုရှိတယ်လို့ ပြောလို့ရပါတယ်။ သူတို့မှာ ကမ္ဘာ့အဆင့်မြင့်ဆုံးကလပ်တွေမှာ ကစားနေတဲ့ အတွေ့အကြုံရှိ ကစားသမားတွေရှိတာကတော့ အမှန်ပါပဲ၊ ဒါပေမဲ့ နိုင်ငံတကာပြိုင်ပွဲတွေရဲ့ အတွေ့အကြုံပိုင်းမှာတော့ ကျွန်တော်တို့က ပိုပြီးသာတယ်လို့ ဆိုလိုတာပါ" လို့ အသက် ၃၂ နှစ်အရွယ် ကစားသမားက ထပ်လောင်းပြောကြားခဲ့ပါတယ်။
