အာဂျင်တီးနားအသင်းနဲ့ရင်ဆိုင်ရတဲ့ပွဲစဉ်မှာ သွင်းယူခဲ့တဲ့ အံ့ဩစရာဂိုးကြောင့် ကိတ်ဗာဒီအသင်းကစားသမား ဆစ်ဒနီလိုပက်စ်ကာဘရယ်က ၂၀၂၆ ဖီဖာကမ္ဘာ့ဖလားပြိုင်ပွဲရဲ့ အလှပဆုံးသွင်းဂိုးဆု (Goal of the Tournament) ကို ဆွတ်ခူးရရှိခဲ့ပါတယ်။ ဒီဆုကိုတော့ ကမ္ဘာတစ်ဝန်းရှိ ပရိသတ်တွေရဲ့ဆန္ဒမဲပေးမှုအပေါ် အခြေပြုပြီး ရွေးချယ်တာပါ။

ဒီမမေ့ပစ်နိုင်စရာဂိုးကို မိုင်ယာမီမှာကစားခဲ့တဲ့ လက်ရှိချန်ပီယံအာဂျင်တီးနားနဲ့ ၃၂ သင်းရှုံးထွက်ပွဲစဉ်မှာ ကာဘရယ်ကိုယ်တိုင် ကန်သွင်းယူခဲ့ပါတယ်။ ကွင်းလယ်ကစားသမားက အချိန်ပိုမှာ အာဂျင်တီးနားဂိုးသမား ဘယ်လိုမှမကာကွယ်နိုင်အောင် အဝေးမှ လှလှပပဝေ့ဝိုက်ကန်သွင်းပြီး တစ်ဖက်နှစ်ဂိုးစီသရေရလဒ်ထွက်ပေါ်အောင် လုပ်ဆောင်ခဲ့ပါတယ်။ အဲ့ဒီပွဲစဉ်မှာ အာဂျင်တီးနားက ကိတ်ဗာဒီကို အသည်းအသန်ကစားပြီး ၃-၂ ဂိုးဖြင့် အနိုင်ရရှိခဲ့ပေမဲ့ ကာဘရယ်ရဲ့အစွမ်းပြမှုကတော့ ပြိုင်ပွဲရဲ့အမှတ်ရစရာပုံရိပ်တစ်ခု ဖြစ်လာခဲ့ပါတယ်။

ဖီဖာကလည်း ကာဘရယ်ရဲ့သွင်းဂိုးနဲ့ပတ်သက်လို့ ကမ္ဘာ့တစ်ဝန်းရှိ ပရိသတ်တွေဆီမှ မဲအများဆုံးရရှိခဲ့တယ်လို့ အတည်ပြုခဲ့ပြီး ကမ္ဘာ့ဖလားသမိုင်းတလျှောက် ပထမဆုံးအကြိမ် ပါဝင်ယှဉ်ပြိုင်တဲ့ ကိတ်ဗာဒီအတွက် အမှတ်ရစရာအခိုက်အတန့်တစ်ခု ဖြစ်လာခဲ့ပါတယ်။ ဒါ့အပြင် အစောပိုင်းမှာလည်း ကာဘရယ်ရဲ့သွင်းဂိုးကို ၃၂ သင်းရှုံးထွက်အဆင့်ရဲ့ အလှပဆုံးသွင်းဂိုးအဖြစ် ရွေးချယ်ခဲ့ပါသေးတယ်။

ကာဘရယ်ရဲ့သွင်းဂိုးက ကမ္ဘာ့ဖလားသမိုင်းတလျှောက် အကောင်းဆုံးသွင်းဂိုးတွေအနက် တစ်ခုအဖြစ် နေရာယူသွားဖို့ရှိနေလို့ ကိတ်ဗာဒီအသင်းအတွက် သူတို့ရဲ့ပထမဆုံးကမ္ဘာ့ဖလားခရီးစဉ်မှာ မမေ့နိုင်စရာ သမိုင်းမှတ်တမ်းကောင်းတစ်ခု ကျန်ရစ်ခဲ့ပါပြီ။