ဘုန်းမောက်အသင်းနည်းပြ အီရာအိုလာက လာမယ့်ရာသီမှာ သူ့ရဲ့နေရာမှာ အစားထိုးဝင်ရောက်လာမယ့် မာကိုရို့စ်နဲ့ ပတ်သက်ပြီး ထုတ်ဖော်ပြောဆိုခဲ့တာ ဖြစ်ပါတယ်။

ဘုန်းမောက်အသင်းဟာ လက်ရှိမှာ ၃၃ ပွဲကစားပြီး ရမှတ် ၄၈ မှတ် ရရှိထားသလို နောက်ဆုံးကစားခဲ့တဲ့ လိဂ်ပွဲ ၁၀ ပွဲဆက်တိုက် ရှုံးပွဲမရှိသေးဘဲ လာမယ့်ရာသီ ဥရောပဝင်ခွင့်တစ်နေရာ ရရှိဖို့အတွက် အမှတ်ပေးဇယားအထက်ပိုင်းကို တဖြည်းဖြည်းချင်း တက်လှမ်းနေတာ ဖြစ်ပါတယ်။

ဒီရာသီကုန်ရင် အီရာအိုလာရဲ့နေရာမှာ မာကိုရို့စ်က အစားထိုးဝင်ရောက်မယ်လို့ ကစားသမားတွေကို အသိပေးပြီး ရက်ပိုင်းအကြာ ဗုဒ္ဓဟူးနေ့ညမှာတော့ ဘုန်းမောက်အသင်းဟာ တန်းတင်ကျန်ရစ်ဖို့ ကြိုးစားနေတဲ့ လိဒ်ယူနိုက်တက်အသင်းကို ဗိုက်တာလစ်တီးကွင်းမှာ ဧည့်ခံကစားရမှာ ဖြစ်ပါတယ်။

အသင်းကို ပထမဆုံးအကြိမ်အဖြစ် ဥရောပပြိုင်ပွဲဆီ ပို့ဆောင်ပေးနိုင်ဖို့ မျှော်လင့်နေတဲ့ အီရာအိုလာက မာကိုရို့စ်ဟာ အသင်းအပေါ် ကောင်းမွန်တဲ့ သက်ရောက်မှုတွေ သေချာပေါက် ယူဆောင်လာနိုင်လိမ့်မယ်လို့ ဆိုပါတယ်။

"အသင်းဟာ အစွမ်းအစရှိတဲ့သူ့လက်ထဲကို ရောက်သွားမယ်လို့ ကျွန်တော် ထင်ပါတယ်။ သူက တကယ့်ကို တော်တဲ့ နည်းပြတစ်ယောက်ပါ။ လွန်ခဲ့တဲ့ နှစ်အနည်းငယ်ကတည်းက သူ့ကို ကျွန်တော် ချီးကျူးခဲ့ဖူးသလို သူ့ရဲ့ အသင်းတွေကိုလည်း အမြဲသဘောကျခဲ့တာပါ။ သူ ဒီလိုပဲ ဆက်ပြီး အောင်မြင်အောင် လုပ်နိုင်လိမ့်မယ်လို့ မျှော်လင့်ပါတယ်။ သူက ဥရောပအတွေ့အကြုံတွေ အများကြီးရှိတဲ့ နည်းပြကောင်းတစ်ယောက်ဖြစ်ပြီး တကယ်ကို စိတ်လှုပ်ရှားဖို့ကောင်းတဲ့သူပါ။ သူ့ကို လူချင်းတော့ မသိပေမဲ့ သူ့ရဲ့ အသင်းတွေကိုတော့ အမြဲသဘောကျပါတယ်။ သူက အသင်းကို သေချာပေါက် ပိုကောင်းအောင် လုပ်ပေးနိုင်မယ့်သူဖြစ်လို့ ကစားသမားတွေအနေနဲ့ ပျော်သင့်ပါတယ်။ ဘာတွေဖြစ်လာတော့မယ်ဆိုတာကို သိကြလို့ ကစားသမားတွေ ပျော်နေကြမယ်ဆိုတာ ကျွန်တော် သေချာပေါက် ယုံကြည်ပါတယ်" လို့ ပြောကြားခဲ့ပါတယ်။

ဒါ့အပြင် အီရာအိုလာက ဥရောပပြိုင်ပွဲ ကစားခွင့်ရရှိတာဟာ သူ့အသင်းအတွက် "မယုံနိုင်စရာ" ကောင်းလိမ့်မယ်လို့လည်း ဆိုပါတယ်။ ဘုန်းမောက်အသင်းဟာ ပြီးခဲ့တဲ့ အပတ်တွေက ဘရန့်ဖို့ဒ်၊ မန်ယူနဲ့ ဆန်းဒါးလန်းတို့နဲ့ပွဲတွေအပြီး အိမ်ကွင်းမှာ ငါးပွဲဆက်တိုက် သရေကျမယ့် အခြေအနေကို ရှောင်လွှဲနိုင်ဖို့လည်း မျှော်လင့်နေပါတယ်။

ဘုန်းမောက်နဲ့ လိဒ်အသင်းတို့ဟာ နောက်ဆုံးကစားခဲ့တဲ့ သုံးပွဲစလုံးမှာ အနည်းဆုံး နှစ်ဂိုးစီ သွင်းယူထားနိုင်တာကြောင့် ဗုဒ္ဓဟူးနေ့ပွဲစဉ်ဟာ အမှတ်ပေးဇယားရဲ့ ထိပ်ပိုင်းနဲ့ အောက်ပိုင်းက အသင်းနှစ်သင်းကြား တကယ့်ကို ရင်ခုန်စိတ်လှုပ်ရှားစရာကောင်းတဲ့ ပွဲတစ်ပွဲ ဖြစ်လာမှာ ဖြစ်ပါတယ်။