တနင်္ဂနွေနေ့က ကစားခဲ့တဲ့ ချန်ပီယံဆုအတွက် အဆုံးအဖြတ်ဖြစ်သွားနိုင်တဲ့ ပွဲစဉ်မှာ မန်စီးတီးကို ၂ ဂိုး ၁ ဂိုးနဲ့ ရှုံးနိမ့်ခဲ့ပေမဲ့ ၂၂ နှစ်ကြာ စောင့်ဆိုင်းခဲ့ရတဲ့ ပရီးမီးယားလိဂ်ဖလားကို ရရှိလိမ့်မယ်လို့ အာဆင်နယ်အသင်းသားတွေ ယုံကြည်နေဆဲဖြစ်ကြောင်း မီကေလ်အာတီတာက ပြောကြားလိုက်ပါတယ်။

ဂန်းနားတို့ဟာ အမှတ်ပေးဇယားထိပ်မှာ ၃ မှတ်အသာနဲ့ ဦးဆောင်နေဆဲဖြစ်ပေမဲ့ မန်စီးတီးကတော့ ကစားဖို့ တစ်ပွဲလျော့ကျန်နေသေးသလို အရှိန်အဟုန်ကလည်း သူတို့ဘက်မှာ ရှိနေတာပါ။

အာဆင်နယ်ဟာ ပြည်တွင်းပြိုင်ပွဲတွေမှာ ၄ ပွဲဆက်တိုက် ရှုံးနိမ့်ခဲ့တာကြောင့် လိဂ်ဖလားနဲ့ အက်ဖ်အေဖလားတွေမှာ ၆ နှစ်ကြာ ဖလားလက်မဲ့ဖြစ်နေတာကို အဆုံးသတ်ဖို့ အခွင့်အရေးတွေ ဆုံးရှုံးခဲ့ရပြီး ဖြစ်ပါတယ်။

အာတီတာရဲ့ ကစားသမားတွေဟာ ၂၀၂၂-၂၃ နဲ့ ၂၀၂၃-၂၄ ရာသီတွေတုန်းကလည်း မန်စီးတီးကို အမှတ်အသာနဲ့ ဦးဆောင်ခဲ့ဖူးပေမဲ့ နောက်ဆုံးမှာတော့ ဒုတိယနေရာနဲ့ပဲ ကျေနပ်ခဲ့ရတာကြောင့် အခုလည်း အတိတ်ကဖြစ်ရပ်တွေ ထပ်ဖြစ်လာဦးမလားဆိုတာ စိုးရိမ်စရာ ရှိနေပါတယ်။

ဒါပေမဲ့ အီတီဟတ်ကွင်းမှာ သိသိသာသာ တိုးတက်ကောင်းမွန်တဲ့ ကစားဟန်ကို ပြသနိုင်ခဲ့တာကြောင့် ကစားသမားတွေရဲ့ ယုံကြည်မှုဟာ လုံးဝ လျော့ပါးသွားခြင်းမရှိဘူးလို့ အာတီတာက အခိုင်အမာ ပြောကြားခဲ့ပါတယ်။

“ကျွန်တော် ဒီနေ့လည်း ယုံကြည်တယ်၊ ဗုဒ္ဓဟူးနေ့တုန်းကလည်း ယုံကြည်ခဲ့တယ်၊ လွန်ခဲ့တဲ့ တစ်ပတ်ကလည်း ယုံကြည်ခဲ့ပါတယ်။ ဘာဖြစ်လို့လဲဆိုတော့ သူတို့ကို နေ့တိုင်း မြင်နေရပြီး ကျွန်တော်တို့ ဘယ်လောက်အဆင့်ရှိလဲဆိုတာ သိနေလို့ပါ” လို့ အာတီတာက ဆိုပါတယ်။ “ဒါပေမဲ့ ဒီနေ့မှာ သူတို့ကိုယ်သူတို့ ပိုပြီး ယုံကြည်မှုရှိဖို့ လိုအပ်တယ်ဆိုရင်တောင် အခုတော့ ပိုပြီး ယုံကြည်သွားကြပြီလို့ ထင်ပါတယ်။ ဒီအကြောင်းကို အသင်းရဲ့ အဝတ်လဲခန်းထဲမှာလည်း ပြောဆိုနေကြပါတယ်” လို့ သူက ဆက်ပြောပါတယ်။

“ဒါဟာ အခုမှ လိဂ်အသစ်တစ်ခု ပြန်စသလိုပါပဲ။ ကျွန်တော်တို့မှာ ၃ မှတ် အသာရထားပြီး သူတို့ကတော့ ကစားဖို့ တစ်ပွဲ လိုပါသေးတယ်။ အရာအားလုံးက အခွင့်အရေးရှိနေတုန်းပါပဲ။ ကျွန်တော်တို့ ဒါကို ဘယ်လောက်အထိ လိုချင်လဲဆိုတာ သိထားသလို ရပ်တန့်သွားမှာလည်း မဟုတ်ပါဘူး” လို့ ဆိုပါတယ်။

လက်ကျန်ပွဲစဉ်တွေအရ ကြည့်မယ်ဆိုရင် အာဆင်နယ်က မန်စီးတီးထက် ပိုမိုလွယ်ကူတဲ့ အနေအထားမှာ ရှိနေပေမဲ့ ချန်ပီယံလိဂ်မှာ ကျန်ရှိနေတဲ့ တစ်သင်းတည်းသော အင်္ဂလန်ကလပ် ဖြစ်နေတာကတော့ အနည်းငယ် ခက်ခဲစေနိုင်ပါတယ်။ ပထမဆုံးအကြိမ် ဥရောပချန်ပီယံဖြစ်ဖို့ ရည်မှန်းထားတဲ့ အာတီတာရဲ့ အသင်းဟာ ဆီမီးဖိုင်နယ်မှာ အက်သလက်တီကို မက်ဒရစ်နဲ့ ပင်ပန်းကြီးစွာ ရင်ဆိုင်ရဦးမှာပါ။

ဒါပေမဲ့ ရာသီကုန်ဖို့ ရက်သတ္တပတ် အနည်းငယ်ပဲ လိုတော့တဲ့အချိန်မှာ ကစားသမားတွေရဲ့ စိတ်ဓာတ်ကို ပြန်လည် မြှင့်တင်ပေးဖို့ လိုအပ်မယ်ဆိုတဲ့ အချက်ကိုတော့ အာတီတာက ငြင်းပယ်ခဲ့ပါတယ်။

“လက်ကျန် ၅ ပွဲပဲ လိုတော့တဲ့ အချိန်မှာ ပရီးမီးယားလိဂ် ချန်ပီယံဖြစ်ဖို့ ကိုယ့်လက်ထဲမှာ အခွင့်အရေးရှိနေပြီး ချန်ပီယံလိဂ် ဆီမီးဖိုင်နယ်လည်း ရောက်နေတဲ့ အခြေအနေမျိုးမှာတောင် ကစားသမားတွေကို စိတ်ဓာတ်တက်ကြွအောင် လုပ်ပေးနေရမယ်ဆိုရင် ကျွန်တော် အိမ်မှာပဲ နေသင့်ပါတယ်။ ဒါကြောင့် အခုက အဲ့ဒီလို အခြေအနေမျိုး မဟုတ်သလို လိုလည်း မလိုအပ်ပါဘူး။ ခက်ခဲတဲ့ အချိန်တွေမှာတောင် မလိုအပ်ခဲ့တာပါ။ ဒါကြောင့် ကျွန်တော်တို့ ရှေ့ဆက်ပြီး အစွမ်းကုန် ပြန်ကြိုးစားသွားမှာကတော့ သေချာပါတယ်” လို့ အာတီတာက ပြောကြားခဲ့ပါတယ်။